May 29, 2022

CZBC

THE WAY, THE TRUTH AND THE LIFE!

JESUH BEK IN NUNTAKNA HI

               (John 14:6) Rev. Moses NginAlh Thang

Pa Pasian hong ompihna leh hong makaihna tawh hunsia kawmkal ah Topa hehpihna thupha tawh Calvary Zomi Tuiphum Pawlpi kum (10) cin leh Biakinn thak hon pawi a zang khawm thei dingin hunhoih hunpha hongpia Topa Pasian in minthanna ngah masa ta hen.

Tulai Pasian thu-um mi tampite lakah sandan leh updan tampi omin tuate lakah Gupkhiatna ngah theihna dingin lam tampi om hi a ci zong om hi. Ahi zongin Lai Siangtho sungah Vantung gam tun nading lampi pen Jesuh sim loh lam dang om lo hi cih hong telsak mahmah hi (John 14:6). Tua ahih manin Pasian umin muangin leitung ih nuntak sungin ih up leh i muanna thu leh a hang teltak, muannatak tawh  upna thu ah kipkhoin muanna lianpi tawh mailam kalsuanna sungah i nuntak ding thupi mahmah hi. Tulai khuahun leh kalsuanzia tawh hi loin Pasian kammal Lai Siangtho tawh kituakin upna thu ah mainawt zawk dingin hong hanthawn nuam ing. Topa’n thupha hong pia ta hen.

Calvary Zomi Tuiphum Pawlpi a kipat cil-in Pasian kammal siksan in Pawlpi na ding uh hi. Tua thubulphuh Lai Siangtho in, Jesuh in ama kiangah, “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi” (John 14:6). Hih Lai Siangtho mun i sim ciangin Jesuh loin kuamah Pa kiangah kitung lo ding ahih manin Jesuh in;

1. Vuntung tun nading Lampi hi.

2. Jesuh in Thuman hi.

3. Jesuh in tawntung Nuntakna hi. 

cih hih thu thum tawh i Tapidaw Nuntakna thala leh tha kipia nuam hi hang. Tua ahih manin Jesuh in Lampi hi i cih ciangin Vantung i tunna dingin Jesuh in Lampi, Jesuh in thuman hi, i cih ciangin Jesuh Pasian Tapa a hihna leh Mihing a hihna thu hih munah bulphuh nuam ing. Thuman i cih pen Jesuh Pasian lah hi, Mihing lah hi cihna thu a man a hihna hi. A nunung pen in-ah Jesuh in tawntung Nuntakna ahi hi. Thu-um mi khempeuh in Jesuh hang bekin i leitung ah ahi a, Kha thu ah ahi zongin kinungta hi. Jesuh hang bekin mi hoih, mi dik, mi siangtho le Pasian tanu, tapa cihna za, thupha kingah hi bek hi. Tua ahih manin Lai Siangtho sung ah;

1. Vantung tun nading Lampi in Jesuh bek hi. (John 14:6)

Khualzin mipa khat a ciah kik masiah a khualzin hi-a ni khatni teitei ciangin a ciah kik hamtang kul hi. Ei thu-um mite zong tua khualzin mipa mah tawh i leitung hinkhua Tapidaw Nuntakna kibang hi (1Peter 2:11). A ciah baih le a ciah hak bek tawh i leitung hinkhua kilamdang hi. Pasian thukham a palsat khit ciangin Adam tungah Pasian in lei tawh kibawl nahih manin nang hong kipiansakna leivui mah ah na ciah kik ding hi na ci hi (Pian 3:19). Lei a kibawl lei mah ah ciah sak kik hi. Ahi zongin Pasian hehpihna hunah a nungta nang le kei a dingin na khempeuh Pasian in Jesuh tawh bawlin Jesuh mah tawh i Nuntakna zong a nunung a nungta dingin hong bawl hi. Jesuh tawh hong kipiangsakin i sih ciangin Jesuh mah tawh a om khawm, a nungta khawm dingte ihi hi (Col 1:16). Pasian tawh hong kikhensak mawhna khempeuh Jesuh in Singlamteh tungah ama pumpi mahmah tawh hong puaksakin (1 Peter 2:24), Singlamteh tungah i mawhna khempeuh kilhcipin ama sihna tawh sisak cipin mawhna leh ei, amah a umte hong ki awhkhasak nawn lo hi. Pasian tate cih min le za i ngah kik nadingin Jesuh in i mawhna Singlamteh tungah a puakna tawh Pasian tate, Pasian maipha ah, Pasian maiah mawh nawnlohna thupha Jesuh hangin hongpia hi. Tua ahih manin hih lei khualzinna pan i om tawntung nading munah i ciah ciangin i tot ding, zuih ding Lampi-in tua Jesuh bek hi, Topa’n minthana ngah ta hen. Isreal te hun lai-in Egypt gam panin Pasian kamciam Canaan gamnuam tunna dingin a zuih lampi in tua Jesuh bek mah na hi hi. Mite muhna-ah lampi a zui ahi zongin Kha thu-ah tua lampi-in a nungta Jesuh na hi gige hi. “Amau’ tenna ding khuapi a tun matengun amah in lampi man-ah a maute a paipih hi(Late 107:7).

A maute a makaih pen Moses hi lo-in (Amah) a cih pa pen a nungta Pasian na hi hi. Tua ahih manin Canaan gam a tun dong uh Pasian in a makaih mah bangin thu-um mite zong Pasian kiang (Vantung) i tun nadingin i zuih lampi-in Jesuh hi cih hong musak hi. Tua ahih manin Vantung i tunna ding i zuih ding lampi in Jesuh bek ahih manin Jesuh in Pa kiang tunna ding lampi hi. Topa’n thupha hong pia ta hen!

2. Jesuh in Thuman a hi hi (John 14:6)

Hih kammal pen ah bang gennuam ihi hiam cih leh Jesuh in Pasian lah hi leitung mihingte mah tawh a kibangin mihing ahihna thumanna a gen nuam ihi hi. A kipat cilin Thu na om a, tua Thu Pasian tawh om khawm a, tua Thu Pasian ahi hi (John 1:1). Tua Thu pen mihing hongsuakin kote lakah hong om a, itna nei-in citak mahmah ahih manin Pasian pianzia ka mu cian uh hi (John 1:14). Jesuh in mihing ahi, nang leh kei mawhna, pumpi ci le sa ah mawhna sungah a nungta te a hong tel theihna dingin Pasian takpi mihing mah sunin a hong paina thu pen aman hi, cih zaw gen nuam hang. Pasian pen nungak Mary’ gil kawmin Jesuh in leitungah hong piangkhia hi. A Nu Mary sung pan a suahna in mihing taktak a hihna hong kilangsak hi (Mt 1:21). Eite’ deihna bang nungta lo a Pasian Kha Siangtho deihna bang in i nuntak theihna dingin mihing mawhna lim pua-in hong nungta hi (Rom 8:4). Pasian hina pi-in mihing tektek mah hong sun hi. Pasian mihing ahihna thu pen a thu bek hi loin a taktak a hihna aman a hihna thu a gen nuam hi hang (Phi 2:7).

Tua ahih ciangin Lai Siangtho sungah Thuman na thei dinga tua Thuman in nang hong suaktasak ding hi na ci hi (John 8:31). Tua thuman in, Jesuh na thei ding a tua Jesuh in Singlamteh tungah na mawhna khempeuh hong puaksakin ama sihna ah sikhawmin mawhna in nang tungah Jesuh gualzawhna hangin thu nei nawnlo, ahihna na upna in nang hong suaktasak hi. Tua ahih manin Jesuh pen mihing bangin hongpailo cih a nialte Satan’ nasemte hi a, Jesuh pen leitung mihing mah bangin leitungah hongpai hi cih a umte Pasian Kha lamlahna tawh thugente ahi uh hi (1 John 4:2-3). Tua ahih ciangin Jesuh in Keimah in Thuman ka hi hi a cih ciangin Jesuh Pasian ta takpi nang le kei mawhna tang dingin Singlamteh tungah i mawhna khempeuh a puak theihna ding leh Pasian tawh eite a tawntung in i nuntakkhawm theihna dingin Pasian mi-in hong pianna pen aman hi a, hih thu upna tawh i san ciangin a umte a dingin sihna pan suahtakna, tawntung nuntakna i ngahna thu Jesuh hang ahihna hong gen ahih manin Topa’n a thakin thupha hong pia ta hen!

3. Jesuh in Tawntung Nuntakna hi (John 14:4)

Nuntakna pen leitungah mihingin kinungta hi. Ahi zongin hih Pasian kammal hong gen nop pen-in leitung i Nuntakna abei ciangin sihngei nawnlohna thu nih om-a tuate in a tawntung meikuangpi(Hell) (Rev. 21:8), le a tawntung Pasian tawh nuntak khawmna(Vantung) thu ahi hi (Rev. 21:22-26). Pasian kammal i sim ciangin, mihau pa si-in kivui a, hell khuk sungah gimna thuakin a om hi, mizawng pa si-in Abraham’ ang-ah a omdingin kipaipih hi (Lk 16:19-31). Hih munah mihau pa cih pen leitung sum le paai ah mihau a ci hi zaw lo-in Jesuh in kamawhna khempeuh pua-in Singlamteh tungah kei tangin sihna hong thuaksaka, ama thawhkikna hangin mawhmaina ngahin tawntung Nuntakna ah hong kha cih a um lote a cihna hi. Pasian Tapa a um lote a tawntungin gimna thuak ding uh hi (John 3:36). Pasian Tapa a um mi khempeuhin tawntung Nuntakna ngah dinga, amaute Pa Pasian tawh nungtakhawm ding hi (John 3:16). Jesuh gumpa le honpa in sangin Nuntakna pen aum mite a dingin Jesuh pen Nuntakna an ahi hi (John 6:32), tawntung nuntakna an pen Pasian kiang pan hong pai an Jesuh bek hi. Tua an a nete pen a gil uh kial ngei nawnlo ding, tua pen nuntak tawntungna an (Thu) ahi hi. Jesuh in kamawhna khempeuh pua-in keima sihna ding tangin sihna hong thuaksaka, ama thawhkikna in Nuntakna thak ah kei hong nungtasak in (1Peter 1:3), sihna zo a, a thawhkikna in kei zong ka pumpi mawhna hangin a si dingin ka nuntak hang, amah a thawhkik mah bangin tho kik taktak ding hi cih hong lakkhia hi, cih upna pen a um mite a dingin Nuntak tawntungna hi.

Piancilna sungah Pasian in mihing (nu le pa) bawlin a nak sungah Hu a mop suk ciangin mihing hong suak ci hi (Pian 1:27). Hih munah Hu a cih pen Kha a cihna hi a, Pasian in a Kha hong muamin tua kha in ei adingin nuntakna hi. Tua ahih manin kei hong umte si nawn loin nungta paisuak ding uh hi na ci hi (John 11:25). Tuni in i mihing hihna sungah i pumpi pen mawhna hangin si ding hi mah leh Pasian Kha Siangtho vangliatna pen eite sungah nungta ahih manin a si ding pumpi sungah Pasian Kha Siangtho om ahih manin, Pasian in a Kha Siangtho a thawhkiksak ciangin a si ding pumpi zong thokiksak ding hi (Rom 8:10-11). Tua ahih manin sihna panin a Vangliatna tawh a thawhkiksak tua Jesuh hangin tuni-in nang le kei sihna ding pan a nungta tawntung dingin thokik ding upna pen Tapidaw upna kha muanna a nei takpi dingin Topa in thupha hong pia ta hen.

Tua ahih manin Jesuh in Keimah in Nuntakna ka hi hi, a cih ciangin lei leh vanah sihna zo a thokik a nungta Jesuh bek om ahih manin tua Jesuh thawhkik vangliatna tawh a siding lei pumpi thokikin ka nungta ding hi, cih upna in na mailam kha tha, up le muanna hong hi sak tawntung ding hi. Tua ahih manin Jesuh a um, a neite a dingin Jesuh in Nuntak tawntungna a hihna thu mimal kim tungah Topa’n a thakin thupha hongpia ta hen.

Tuni in i mihing Nuntakna sungah – Thomas in, “Topa aw, na paina ding mun thei lo ka hih manun a lampi ding bangci theih ding ka hi uh hiam?” a cih ciangin, Jesuh in ama kiangah, “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi” (John 14:6), cih i sim mah bang in i Tapidaw Nuntakna pen Christian min bek tawh nungta hizaw loin Jesuh min suang loin Pa kiangah a tung thei dingte ihih lohna a kiphawkthak ding leh Jesuh min sim loh lei le van ah gupna i ngahna ding a dang om lo a hihna (Acts 4:12) thu Nuntakna hu i neih lai-in kiteltak a upna ah a nungta, a khamuang thu-um mi i suah theihna dingin Kha Siangtho lamlahna thak, hopihna thak, i ngahna ding Topa’n thupha hong pia ta hen. 

Hong simsak mimal kim tungah thathaklakna, kipuahphatna le kilamthakna thupha hong hi sak ta hen. Lungdam.